الجزء 39
قاطع تفكيري صوت الجمبي ..
قالي ، انا مش قلت ليكي عيشي اللحظة ، ليه مصرة تحزني ؟
عاينت ليهو بأستغراب و قبلتا وشي منو ،. قالي انا ما ملقوف على فكرة ، انا اي حاجة تخطر في بالك متوفرة عندي ، رغم ذلك ما لاقي السعادة ،
قلت ليهو امك بخير ؟ قالي ايوا ،،
قلت لبهو :
*ابوك بخير ؟
_ايوا حمدلله
*يبقى حرام عليك تعيش حزين و مكتئب ، دي سعادة مال الدنيا كلو ما بيوفرها ليك ..
_انتي يتيمة ؟
*(عيوني رقرقت) لا
_طيب شنو ؟
*ولا حاجة !
_ما حضغطك تحكي ، بس مافي حاجة بتحصل فوق طاقتك مهما كان شعورك كعب فا اتاكدي انه صيرو يمر ...
*ان شاءالله ... و بعدها الطيارة ابتدت تهبط ، بالجد كان متعب ، ضغط و صداع و لفة راس و صنة اضنين ، تعبت شديد ، و انا خاته يديني في اضنيني ، قام مد لي حاجة ، عاينت ليهو ، هز لي يدو ، قلت ليهو دا شنو ؟ قالي براحه مالك بتكوركي ، قلت ليهو انا كوركتا متين ؟ قعد يضحك قالي اضنينك صانة صح ؟ قلت ليهو ايوااا ، قالي دي لبانة اكليهااا بسرعه ،، شلتها منو ، اكلتها من تحت النقاب ....
كان مركز معاي شديد ،،، و لا عشان اول مرة اركب طيارة كنت فرجة ما عارفه !
المهم ، هبطنا و الناس ابتدت تقوم ، و البنزل في شنطو والشفع البيبكو ، المهم انا كنت قاعده بس لحد م القى طريقه و انزل ...
قالي راجعة السودان تاني ولا شنو ههه ؟ قلت ليهو اااي ، قالي قومي عشان تحصلي السير يلااااا ... طوالي قمتااا ، طلع هو قدامي و انا اتزنقتا ، و تاني ما لميت فيهو ولافكرتا فيهو اصلااا ...
بقيت ماشة ورا الناس بس, صالة ورا صالة ، لحد ما خلصت اجراءتي كلها ، و مشيت واقفه منتظرة شنطتي ... لمن جات ، شلتها جريتها ، قلت اسي بتكون واقفه منتظراني .. جريت حري بقراا و بفتش في صالة الانتظار ، لحد ما لقيتا !
بعاين كلهم هنود و آسيوين، شلت تلفوني ، لقط من شبكة المطار ، كنت منبهرة شديد بمطار ابو ظبي بالجد حاجة روعه ...
واقفة و ماسكة تلفوني بكتب رساله للزولة الكانت متفقة معاي ، الرساله بتجيني قح واحد !
بتصل واتساب نفس الشي ...
فجأة سمعت صوت بيقولي ، منتظراني صح ؟ اتخلعت قلت ليهو انت ؟ قالي ايوة انا ، مالك واقفة هنا ؟ قلت ليها منتظرة ، قالي طيب لو عارفه العنوان ممكن اوصلك معانا عربية ..قلت ليهو شكر بس ممكن طلب ؟ قالي اامريني ، قلت ليهو اكيد معاك شريحه اماراتية صح ؟ قالي ايوة ، طلع تلفونو قالي قولي الرقم ،قلت ليهو عرفت كدااا براك ؟
قالي دا الطبيعي قولب الرقم ، قلت ليهو اكتب 00249....مليتو رقم امي ... ردت علي .. * السلام عليكم امي
_رحمة بتي كيف وصلتي انتي طمنيني ؟
*الحمدلله اتطمني ، انا بخير نومو تمام احتمال لحد بكرة حتى اقدر اعمل شريحه ..
_اها جوكي الناس ؟
*قربو علي في السكة ( عشان ما تقلق)
_ودعتك الله
*وداعةالحي الدايم يا غاليه .....*قفلتا ..
بيعاين لي و مبتسم ،قلت ليهو شكرااا ، قالي اها و المنتظراهم ديل ما حتكلميهم ، قلت ليهو ممكن لو ما فيها تقلة عليك ، قالي قولي الرقم ، قلت ليهو 05.... ،طبعا قعدت اتصل لمن التلفون سخن مافي زول رد علي ، لمن خفتااا ...
قلت ليهو شكراا معليش عطلتك !
استغرب كدا و وشي جاب على ملامح قلق ،، قالي حتقعدي كدا ؟ قلت ليهو عادي بكونو في السكة ، قالي هم منو ؟
سكته ! قالي هما منو ؟ قالي بسالك ديل منو ؟ قلت ليهو امشي ناسك بكونو برا منتظرنك !قالي انا ما بعرفك ايوااا ، لكن ما بقدر اخليكي كداا ، قلت ليهو النت شابك و متواصله معاهم م تشيل هم ...
مشى على الماركت حق المطار ،، جاب لي قزازة موية و كيكة ..قالي مجبور امشي والا م كان خليتك ، دا رقمي كتبتو ليك هنا ، انقلي في التلفون ، و سجلي ..( كنت مخلوعه من تصرفاتو ، فعلا ربنا بيوقف الناس لبعض)
كانت بايخه م اسجل الرقم ، شلت منو الحاجات ، و وقف لي لمن نقلت الرقم و قلت ليهو ، اسجلو بمنو ؟ قالي مؤيد ... قلت ليهو تمام ...
بعداك قالي ، يلا سلام عليكم ...قلت ليهو و عليكم السلام ! وفات
( في جانب متوكل )
يا الله ، تعدي علي اليوم دا على خير
يا الله ، ما تزرع جواي ذرة احساس كعب تجاه رحمة ، هي كمان معذورة ،، يا رب تحميها و تقويها ، يارب تحميها يا رب الله ، اللهم اني استودعتك اياها ، انها في و دائعك يا رب العالمين .....
قلبي واجعني شديد ، انا كيف بحبهاا رغم كل حاجة ، كيف بحبها و هي سبب كل احساس كعب جواي ، سبب كل الم ،، خلتني وراهاا و ما عملت اعتبار لوجودي و لحبي ، اول مرة اكون بالصعف دا !
ما قادر و ما عارف اعذرهاا ولا اكرها ما قادر ،، يا رب تلطف ..
اما ، انا ، قاعدة في مكاني ، الطيارة البعدي جات والبعدها جات ، دخلنا الفجر وانا قاعدة ، عامل النضافه مسكين ، يمشي و يجي جمبي ،. حتى الموية المعاي بقيت جغمة جغمة بشرب فيها عشان ما تنتهي مني ! قمت مشيت الحمامات ، غسلت وشي وهويتو شويه من النقاب ، حاولت اتوضأ ما عرفتا و حتى لو اتوضيت ما حعرف اصلي واخلي شنطتي ... اساسا في مطار فخم زي دي الحيسرق شنطتي منو !
اا الحمدلله بس ..
هويت شوية ،و لبست نقابي و طلعت ، لقيت في طيارة كمان واصله ، و المحزق والملزق و القصير و الطويل وشعري و شعرك ، قاعده للفرجة ، كل شوية اعاين للواتساب ، مافي اي رد ولا حتى الرساله ما وصلت !
خلاص وصلت مرحلة من الضيق و الخنقة و عيوني دي لمن رقرقت ،و ابتديت افكر ان دا مقلب ولاخدعه ولا دا رقم وهمي., تاني استبعدتا حاجة زي دي ، كيف وهمين و هما مرسلين لي وخسرو فيني قروش ، مستحيل بس في مشكلة يمكن عندهم ...
الافكار دا رافقتني لحد تاني يوم الصباح انتو متخيلين انا لي كم في المطار دا ؟ وقاعدة القعده دي !
دخلت الواتساب كانت الساعه 9:23 الصباح .. عاينت لقيتهم استلمو الرسايل حقتي ومافي رد ، اتمغستا عديل ،، قمت عملت مكالمة واتساب ، كنسلت فيني ، اتضايقتا والله دايرة اطرشق .. بعد شوية كتبت لي ، اطلعي برا انا واقفة جمب سيارتي ، قدام صالة 1 ، ما صدقتاا ،كريت شنطتي ، و طلعت برا قعدت اتلفت .. اتلفت
لمن شفت وحدة لابسه عباية وناقشه و كعب عالي والشعر تحت الطرحة بوف. , قلت ليها انتي مدام عبير ؟ قالت لي ايواا ، سلمت عليها وانا شاماها ، فتحت لي ختيت شنطتي و ركبتا ورا .. قالت لي تعالي قُدام حبيبتي ، قفلت الباب الورا وركبت جمبهااا ...
م قدرت اسكت قلت ليها اتأخرتي علي !
قالت لي ايوة شالتني نومة ( بكل برود ) ،، قلت ليها اهااا ...و سكتا منها ..
مشينا مسافة و في حالة صمت ، بعدين قالت لي :
_ذي اول مرة تزورين فيها ابو ظبي ؟
*الامارات كلها ، ااي اول مرة
_ان شاء تنبسطي
*يا رب ، بس كنت عايزة شريحة اطمن اهلي
_اوكي بس نوصل
*لسة بعيد ؟
_لا، خلاص وصلنا هذي كلها اسمها بني ياس و كلها متقسمة عشان تكوني عارفه
*ايوة ، كيف متقسمة ؟
_يعني بني ياس شرق و بني ياس غرب و مترقمة بعد ، يعني الحين المحل في بني ياس #شرق8 و السكن كمان ..
*شرق8 !!
_ايوة لازم تحفظي المكان ، بني ياس شرق 8 عن سوق البلدية ، ذا اقرب وصف ..
*اهاااا ، المنطقة هادئة
_ايوا. ، و كلها كوافيرات ، الحين بوديكي المحل تشوفيه ، و من بكرة دوام باذن الله ..
*( في سري قلت ليها توديني شنو انا هلكانة عايزة انوم اول ) تمام ...
المهم ، اتصلت على وحدة ، جات فتحت لينا المحل ، كوافير ما كبير لكن راقي و مفروش خلووو ، ما ممل ... فرجتني فيهوو ، و بعداك طلعناا ، ركبنا و قفت عند البقال ،، جابت جبنة و عيش و عصير و كدااا ..
و بعداك قالت لي بنمشي على السكن ..قلت تمام ، قالت لي ركزي في الطريق ..مشوار ربع ساعه بالعربية ، قلت ليها دي وين اسي ، قالت لي هي شرق8، قلت ليها كبيرة ماشاءالله !
المهم وصلنا نص فلل ، بصراحه انبسطتا ، فلل و عربات تقول يا ليل ..
نزلنا كريت شنطتي ، دخلنا بي ممر في ممر ، في زقاف ( زقاق عديل )
وفجاة تقيف جمب باب صغير وتخبط ، و تاندي في وحدة اسمها رشما(هندية) ،، انا انصدمتاا من البيت في نص الفلل دي !
بعد شوية جات وحدة فتحت ، قالت لي ادخلي معاها يا رحمة هي حتدلك ، و اديني جوازك ،، انا بكل طيب خاطر طلعت جوازي من الشنطة و اديتو ليها !
و هي مشت !
و دي ماسكة الباب و واقفه لي ، دخلتا ،و تاني دخلتا لجوااااا و يالطيييف من الشفتوو!!