الجزء 42
بقيت بخبط مافي زول بيفتح لي و بشلت الباب مافي زول فتح عرفت انهم م رجعو من شغلهم ، و انحنا بابنا في زقاق ..
بس دا وقف عربيتو ، و جااا علي !
، بس عيني جات على الكاميرا ، حسيت بشويت امان انه لو لا قدر الله حصلت لي حاجة بيقدرو يوصلو ليهو !
و انا قاعدة اقوليهو انت عايز شنو ، ابعد ، ابعد ، بس سبحان الله جا رجل مارق من الباب الجمبنا ، نفس بيتنا بس جزو تاني منو ،، لمن شاف الوضع ، قام جا جاري ، قاليهو خير يا استاذ !
طوالي ، جرى ،، وقف متحير ، قالي انتي شكلك جديدة هنا ، انتي ما عارفه انه ممنوع الحركات دي ، اذا حتعملي زي القبلك بلحقك الشارع ! دي حالتك منقبة و ملتزمة ! بس قعدت ابكي بي صوتي ، هو اتخلع ، قالي في شنو !
بس ببكي ، قالي مالك اسي !
قلت ليهو انا خايفه شديد لو ما انت الله اعلم كان حصل فيني شنو ، انا ما بعرفو بس لاحقني من الشارع ، والحته مضلمة ، و بخبط مافي زول بيفتح !
قالي ايوا ديل بيجو مرات 12 ، طيب رشما ما نسخت ليكي مفتاح برا ليه ، قلت ليهو انا ماعارفه حاجة وهي ما بتفهم كلامي !
قالي خلاص انا بكلمها ، قلت ليهو انت سوداني ؟ قالي لا انا ارتري و انا ساكن في النص التاني بي مرتي واولادي و مسؤل من ايجار البيت دا !
قلت ليهو اها تمام ،، قالي شكلك جديدة هنا ، بس خلي بالك من نفسك ومواقف زي دي حتتعرضي ليها كتير ، و ما تظهري خوفك ، هنا ما بيعرفو بت الحلال من بنت الحرام و السيئة تعم !
قلت ليهو فعلا ! طيب انت ما عندك مفتاح تفتح لي ؟ قالي لا ما بقدر اشيل نسخه والبيت فيهو حريم !
قالي لو عايزة تعالي اقعدي مع الاولاد لمن يجو ، قلت ليهو لالا بنتظر هنا !
قالي تمام ... قلت ليهو النت هنا كيف ! قالي البيت فيهو شبكة انا المسئول عنها ، بتدفعي 50درهم للشهر ! قلت ليهو تمام ، شكرا كان بقيت عليها بصل المدام و بكلمها !
قالي تمام .. و مشى !
قعدت في المسطبه الجمب الكولدير ، لاحظت في محلات كدا بس م شغاله كدا ، زي صيانه وكهربه ، و في شارع عمومي ، المهم بطني قرصتني من الجوعه ! و انا في قعدتي دي ، طلعت العلبه حقت الرز ، و قعدت اكل من تحت النقاب ،،،
( في جانب اسعد )
انس : يا صحبي انت من امبارح ما اسعد البعرفو مالك ؟
اسعد : مالي يا زول مافي حاجة حمدلله
انس : والله في ، حاجة سارح مالك ؟
مايكل : بيفكر في مرتو ههههه ، استغليت فترة سفري و عرستا يا كلب ..
اسعد : هههه عرسي ، اااااخ ، يازيت الدمن يرجع يا مايكل
انس : ليه ؟
اسعد : والله الاتزوجتها ضيعتها ، مني و نفسي ارجعها و ما عارف ولا قادر !
مايكل : كل حاجة ليها حل صدقني
اسعد : هه الا دي .. شلت يدي براي و طبزت عيني ..
انس : حابيها شديد واضح ..
اسعد : شديد دي زاتا قليله عليها
مايكل : المانع شنو ترجعو ؟
اسعد : قصه طويله !
انس : عايز تبقى زي مايكل ههههه اخير. انت يا اسعد ، لكن حقت مايل دي حظرتو عديل ، شهور عديل فاتت ومانساها ..
اسعد .ااابببب ابببب ، مايكل دي غير خطيبتك ؟
مايكل : خطيبتي خليتا طول ، دي موضوعها حساس و فيهو دين و حاجة اكبر مننا ..
اسعد : ايواااه ، لالا يا زول ربنا يجيب ليك السمح ..
مايكل : تسلم
خلصتا اكلي ، و مشيت الكولدير ، شربت موية بيدي ، و رجعت مكاني ،، شفتهم من بعيد جاين ، شفتهم قربو ، وقفتا على حيلي انتظرتهم .... جو لا كلام لا سلام ..فتحت االباب و دخلو الاتنين ، دخلت وراهم وقفلت الباب ،،
قلت ليها لو سمحتى اعملي لي نسخه من المفتاح ! مدت لي يدها ،، قلت ليها شنو ؟ قالت لي (خلوس )=فلوس ، قلت ليها كم ؟ قالت لي خمسة درهم !
فتحت شنطتي اديتهااا .. شالتها خطف و مشت ،، فتحت بابي ، و دخلتا ،، غيرتا و رقدتا شوية ، و جبت الكرت ، اتصلت على امي ما ردت و يمنة نفس الشي ما ردو علي ..
(في جانب ناس امي )
متوكل : دا كلام شنو ، كيف يعني تشيلو من الاجهزة و هو عايش !
الممرضة : حالتو طولت ومافي تحسن ، و الاجهزة اولى بيها مريض تاني ..
امي : دا كلام شنو انتي مجنونة ، كيف يعني اولى بيها مريض تاتي ، ماخو كمان مريض ..
يمنة : ابقي مرة اعملي كدا والله اقفل ليكم المستشفى دي ..
متوكل ؛ دقيقه يا يمنة و خالتي ، خليها تشرح لي ، فهمكم شنو انتو ! هو زول عايش تعالجو و لا تزيدو حالتو سوء !
الممرضة : نعالجو بس هو محتاج عملية و قروش و انتو ما بتدفعووو ..
امي : كلها مسألة وقت ،، اصبرو شويه ارجوكي ..
يمنة : ما تترجيها غصبا عنهم يخلو في مكانو ..
متوكل : الواضح انكم محتاجين زول يطربق ليكم المستشفي دي علي ريسانكم ، رزززحي كدا ، وينو مكتب رئيس القسم ا ، انا الليله اوريكم ، اساسا داير اتفشي انا ، من خلاة مستشفيتكم ولا من نضافتا !
امي : متوكل عليك الله لا ، م تعمل مشاكل انحنا المحتاجين ليهم ارجوك ، سايسهم بس لمن رحمة ترسل !
متوكل : هما لو قالو مشكلة قروش بنحلها لكن ما تستهيفنا بالطريقه المهينة دي !
امي : اساسا مشكلة قروش ، محمد محتاج للعمليه ، بس ادعي رحمة تتوفق !
متوكل : امين
يمنة : غاظوني الله
يحرق دمها
زي ما حرقت دمي ياخ ..
متوكل : رووقي ، انا بمشي لرئيس القسم بتفاهم معاه ، امشو على العربيه انتو ..
امي : تمام ...
اما انا ، نمت و انا ماسكة التلفون ...
م صحيت الا تاني يوم بقدرة قادر قمته ، حتى المنبه ما كان مزبوط ،، المهم يا ناس ، قمتا على روتيني الاتعودتو عليهوو ، و لبست و طلعت على شغلي ..
وصلتاا ، لقيت كل واحد بتنضف ليها حته ،، مسكت معاهم ، و مريم دي قالبه خلقتها فوقي ،كتر خير نسرين الهندية ، طوالي بترشدني و معاي ، حتى جايبة لي معاها فطيرة و عملت شاي و ادتني معاها ، قعدنا شويه ، جات مجموعه بنات ، استشوار و شعر وحنة وكلام زي دااا ...
فا العرفتو ان مريم بتشتغل نفس شغلي ، البنات الجو اربعه ، استشوار و ويفي ،، قبل نبدا ،جات مدام سارة ،،
قعدت بتتكلم في التلفون من جات ،، قامت مريم قالت لي يلا تعالي ، اعملي لي دي ، قلت ليها تمام ،، مسكت البت استشورتها ، و عملت ليها الويفي و قفلت ليها الشعر في ثواني ، مدام سارة جات قالت لي ماشاء الله ، امسكي التانية ، قلت ليها تمام ، مسكت التانية كمان نفس الشي ، انا عندي السرعه لاني بحب الشغل دا فا بستمتع ..
و كل دت مريم في وحدة ،، لمن جا دور اخر وحدة انا قلت دي مريم تسوي ليهااا ،،
انا مشيت ارجع الحاجات في ادراجها ، الزيبونة قالت لي لا انا عايزاكي انتي ، قدامهم كلهم ، مدام سارة قالت لي اعملي ليها ،، و جيت مسكتها ، و مريم دي لمن بقت تخبط و ترزع من الزعل ، ( دي النوع البكون حاقد عليك بضحك في وشك بس من جواه بيكرهك ) ..
خلصتا و مشيت قعدتا و باقي الشغل كان حق الهندية والسوريه ..
قريب العصر كدا مدام سارة قالت لي سوي لي تسريحه و ركبي لي الوصلات دي ، قلت ليها تمام ،، انا م كنت بسال عن حاجة بشتغل بي راسي و استنتاجي رغم اني في حاجات اول مرة استخدمها .
المهم ركبت ليها و عملت ليها شعرهر تمام ، استشورت نص و خليت نص ،جات مريم بتضحك قالت لي والباقي ليش ما استشورتيه ؟ قلت ليها حتعرفي اسي ، قامت ضحكت ضحكة استهتار ..
جبت البنس و الحاجات و زبطت ليها التسريحه ، قلت ليها عرفتي ليه ؟ عشان الشعر يفضل ماسك ، في اماكن البنس ، و بعد كدا بنعمل الويفي بس و بالاطراف عشان م نقصر طول الشعر ، لانو هي رقبته طويله ماشاء الله ...
مدام سارة دي كانت معجبه بي شديد ، و مريم انتو اتخيلوها عامله كيف !
انا ما قصدت استفزها انا قصدي اوريها خبرتي وهي توريني ، بس الموضوع مشى في منحدر تاني !
( في جانب ناس امي )
*انا متاكد يا خالتي دا البيت !
_اجي ! يا ولدي انت غلطان شكلك
يمنة : لا يا امي ياهو زاتو البيت ، نفس النيمة حقت جيرانهم !
*لاحول ولاقوة الا بالله العلي العظيم ، كدي انا بنزل اسأل الجيران لو بيعرفو حاجة عنهم
يمنة : كيف الكلام دا يا امي معقول ؟
_شوفة عينك يا بتي ، ربنا يلطف !
قريب مواعيد السغل تنتهي ، قلت ل نسرين نفسي اطبخ ، قالت لي ليش م تطبخي ، قلت ليها ديل كل واحد بي حلتو وانا م عندي شي ، قالت لي بتدفعي اشتراك معاهم ،، قلت ليها كم ؟ قالت لي 10 درهم للفرد !
قلت ليها حلوو ، طيب .....
شويات و طلعنا ،، مشيت لولو خلاص عرفته براي !
شلت حاجات بسيطة شديد لا تزكر من كل حاجة محتاجاها حبتين، و حاسبت و شلت اكياسي و مشيت للمجهول !
يتبع ...