الجزء 46

مناهل: ما اكتر مني يا مريم ،، بس ربنا ما بخلي لينا حقنا ، خلي يصبر ...

ابتسام : حسام ما حيزعل لو طلعنا من البيت دا ، هو زنبو شنو المسكين دا يتحمل اغلاط ابوه ..

مريم : دا عشان بيحب مناهل با امي

ابتسام : هو اصلا مختلف ، بس ليهو كم يوم مختفي ، اتصلي عليهو يا مناهل ..

مناهل : طيب يا امي ....

( في جانب ناس امي )

يمنة : يا امي انتي لسه ؟

*ما تجوطي ، قربتااا

_طيب ، اساعدك في شنو ؟

*جيبي لي اكياس الحرارة بس و غلفي ، غلفي كويس م تخلي حته مكشوفة عشان ما ينشف !

_طيب طيب .... اوف البوري دا بيوترني ما يصبرو ديل كمان ياخ ..

*انتي انجزي انا فضل لي طبقين اعبيهم ..

_طيب ......... الله يا امي دا شكلو مبالغه امممم دايرة اضوق ..

*حق الناس ما تمدي يدك ، بكرة حعمل طلبيه ، ضوقي ..

_احي اليصبرني شنو لبكرة ، عايني دقيقه اصورو عشان انزلو في القروب ، لو لفيت بالكيس حيعكس لي الاضاءة ..

*سرعه بس ....

_زحي يدك يا امي ! ... يا سلام لو تشوفي الصورة ، ررروعه ... يلا جيبي ، امشي اللبسي توبك يا امي عشان تشيلي حسابك ..

*طيب لفي كووويس يا يمنة ...

_طيب ...طيب ...

اما انا ، كنت شايله الشغل براي انا و تسرين ، ختي مدام سارة انتبهت ان مريم ، مسهية و شبه نايمة ، بتسألني مالها ؟ قلت ليها ما عارفة ... كل حاجة بس بقول ، ما عارفة !

خلصنا دوامنا ،، و طلعنا ..

مشيت المول ، حولت رصيد ، و لفيت اتفرج في عروض اول الشهر و رجعتاا ،،

دخلتاااا ، لقيت الشيشة قدامي ، و الضحك دا و اللبس و النحنة في التلفون ، اتخلعاا ، سكتا ما اتكلمتا ،، لا ما براهم ، في بنات تانين !دخلت الحمام غيرتا ، و اتغطيت و رقدتا و بعاين من تحت لتحت و الريحة دي عايزة تقتلني .. بس فجاة قمت على حيلي ،،و طلعت برا الغرفه ..شات تلفوني اتصلت علي شيماء ..

*السلام عليكم

_وعليكم السلام هلا بناس ابو طبي

*شوشو كيف حالك

_حمدلله بخير والله بس فاقداكي ، و من انتي مشيتي نزلت مرجان دا و قاعده افتش ياخ ، زول عبرني مافي ، لكن انتي محظوظة ضربت معاكي ههههه ..يلا اشتغلي و اعملي اقامة عشان تجيبيني ...

*شوشو حبيبتي نتكلم بعدين في المواضيع دي ، اسي انا محتاجة رقم سيدة ، ما ظاهر معاي ، رغم اني كنت. مرسله ليها قبل كدا انا متأكدة ...

_طيب ارسلو كيف ؟

*رسااله عادية ،، سرعه كدااا ...

_طيب يلا ...

*اسي طوالي عليكي الله ..

_طيب.. طيب ...

وقفت برا لمن رسلت لي الرقم .. و اتصلت عليها (لمن عملت اتصال ياداب ظهر لي انه متسجل ).. مرة و اتنين اتصلتا ما بترد علي ..بعدها بلحظات رجعت لي ...

_الوووو

*سيدة كيفك !

_منو معاي ؟

*انا رحمة يا سيدة

_ وووو رحمة ، ههههه حمدلله على السلامة يا شقيه والله ضربت معاكي انا شهور عديل حتى لفيت طريقه ... تتزكري كلامك عن السفر كان كيف لمن جيناكي في البيت هههههه ...

*اهااااا ، سيدة ياخ انا براي متضايقه ما تشغليها لي زيادة ..

_ليه مالك ؟

*مخنوووقه والسكن كلو قرف دا السكن التاني اقعد فيهو ، ياخ سهرات و اخر مسخرة و دخاخين ...

_طيب عادي يا رحمة ، انتي ما بتقدري تجبريهم ، و بعدين معقداها مالك فليها ياخ ، ما كفاية الواحد نفسيا مضغوط ، يعني دي اقل شي الواحد يرفه بيها عن نفسو ..

*اكيد ما جادة انتي بتواسيني ولا شنووو

_اسمعي اسمعي انتي دايرة ليك قعده ، اجازتك يوم شنو ؟

*الاحد ...

_طيب رسلي لي اللوكيشن حقك واتساب ..

*ما عندي نت

_افتحي شبكة من اي وحدة بس رسليهو لي ، و لمن اجيكي بعمل ليكي نت ..

*تمام حبيبتي .. يلااا م تقطعي مني ..

_اكيد ان شاءالله ...

قفلت منها و نمته ..

( في جانب اسعد )

بيهري في نفسوو من التفكير ، و الانفعال. ..

رحمة الشريفه ، المحترمة ، وشها دا ما شفتو الا صدفه . هئ طلعت بتتعرف بالاولاد و بتركب معاهم هه ، طيب مش انا اولى برضو ! كويس انا بوريكي يا رحمة !

( في اليوم التاني ، في بيتنا )

يمنة : امي يلااااا اتاخرتا على محاضرتي ..

*دقيقه يابت ، بلف في توبي

يمنة : اااخ متين نفتح لينا محل ، والله لو في محل شغلنا ما حيمشي كدا زاتو ، كدا هير و بركة حمدلله..

*بتنقني في شنو ؟

_بتكلم براي يا امي .... يلا يلا ، المفتاح يا امي ..

*معاي .. كيس ابوكي حق الغيارات وينو ؟

_اشيلو بي وين يا امي ، اااخ يا حليل متوكل ياخ اسي كان وصلنا ...

* هدا ليهو الكيس ، اطلعي اطلعي...

بعد طلعو و بيقفلو في بابا الشارع كانت المفاجأة هنا !

يمنة : مناهل !

مناهل : ( حضنت يمنة ، و سلمت على امي ، سلام الكتف ) ..

امي : ( بي خلعه ) انتو وين ، انتو كويسين ، اختك وامك وين ؟. مالك ما طبيعيه !

مناهل :شكلكم مستعجلين يا خالتي و *ما دايرة ا ....*قاطعتها امي ..

امي : وريني حاصل عليكم شنو ، فتشناكم كتير يا مناهل فجاة اختفيتو و البيت فب الواطه ، حاصل شنو ؟

مناهل : الموضوع طويل و انتو محملين حاجات ، انتو امشو انا بعدين بجيكم و اصلا عايزاكي في موضوع ..

يمنة : امي انا بتصل بالمحل اقوليهم حنتاخر شوية ،. و ابوي

لحد الساعه اربعه عندنا و انا اول محاضرة ما مشكله ، خلينا ندخل ، نتكلم جواااا ، افتحي افتحي يا امي !

امي : يب طيب ...... تعالي يا مناهل ادخلي

مناهل : اسفة ...

امي : انتي عويرة ولا شنو ، و بعدين انا دايرة اعرف الحصل شنو و شاكة ان خالك الحيوان دا ورا القصه دي ..

مناهل : فعلا ، كتب امي تنازل بالقوة ، دا غير انه ناهب حق امي و خالتي الله يرحمها كانت اتنازلت لامي ، و موضوع طويل ، اخر حااجة لينا اكتر من شهر من خلينا البيت طلعنا مطرودين اصلي ما بنسى اليوم دا ،، و كتر خيرو حسام خطيبي ، او الكان خطيبي ياهو ود خالي عبدالله .. لحقنا واجر لينا بيت صغير قاعدين فيهو من غير علم خالي ، و خلاص ضاقت و حملنا عليهو ... و اسي انا جيتك عشان الموضوع دا ...

امي : حسبي الله ونعم الوكيل ، لا حول ولاقوة الا بالله .... شوفي يا بتي قبل تتمي كلامك ، الحمدلله بيتنا واسع و اسي مافيهو غيري انا و يمنة ، و دا ليكم حق فيهو ، تجو تقعدو معانا معززين مكرمين لمن محمد يقوم بالسلامة ...

مناهل : دقيقه ،،، ليه رحمة وين ؟

امي : سافرت الامارات

مناهل : كيف الكلام دا ؟

يمنة : موضوع طويل بنحكيهو ليكي ..

امي : امسكي دا المفتاح الاحتياطي ، انحنا طالعين ، جيبي امك و اختك ، ويا يمنة وريها الغرفتين الفاضيات بي برندتهم ....

يمنة : تعالي .........

مناهل : بصراحه ما اتوقعت تتصرفي معانا كدا ، وانا جايه و دايرة اطلب منك كدا ، لان امي رافضه خايفه من المشاكل ، و انا جيت اتكلم معاكي اول ، في النهايه مافي مرة و ضرتا بقعدو في محل واحد ..

امي : يا بتي انحنا في شنو اسي ، الواحد بقى بيتفادي المشاكل الدنيا دي ما فيها حاجة و الكان رابطنا انا وامك بين الحياه و الموت ، كلمي امك يا بتي .... انحنا ذالعين عندنا مساوير بعد نرجع نتكلم ...

مناهل : انا طالعه معاكم اشوف ابوي حتمسو اسي ؟

امي : لالا اسي رتبو اموركم انحنا بنزورو كل يوم ، ممكن تمشي معانا ،

مناهل : طيب

امي : يلاا احنا مشينا ....

بعد امي و يمنة طلعو ، يمنة قالت لامي ، يا امي انتي نسيتي متوكل ؟

امي قالت ليها نسيتو كيف يعتي ؟ قالت ليها مش كان مكلمك على نص بيتنا قال داير يأجرو ، اسي حيقعدو اخواني ؟

امي قالت ليها ، ديل اخواتك القروش البتجي من الايجار دي ما بتعوض المحنة و بعزين اخليهم في الشارع يعني ؟ اكيد لا يا يمنة ، دايما حاولي تعايني للحاجة الفيها رضا ربنا ، القروش بتمش و تجي و اصلا هدف متوكل عشان يبقى راجل معانا... بعدين بتكلم معاهو و هو حيتفهم ... واصلا حيجي عشان يجيب تحليل ابوكي ، و يحددو لينا العملية ...

اما عندي اناااا ... يومي عادي في الشغل ، بقيت زي البجي ف المحل نفسيا برتاح رغم ضغط الشغل ،، لمن قربت اخلص ، اتصلت بي سيدة قالت جاياني نتعشى !

فعلا ، لمن وصلت كان خلصت شغل ،، طوالي جريت تحت ، و بالتلفون معاها ف الاخر قالا لي انا راكبه عربيه مظلله ..

قلت ليها يا سلام ربنا يزيدك ، قعدت تضحك ، قلت ليها شفتها انزلي ، قالت لي لا تعالي اركبي انتي ....

فعلا لمن قربت من العربيه نزلت من قدام سلمت علي شديد ، و ركبت ورااا ...

عاينت للسواق زول تلتينات ، و شكلو اماراتي بالقطرة والجلابيه ،، سلم علي قالي ازيك يا عسل... افتحي وشك دا خلبنا نشوف الجمال السوداني !

*في الخلقة الجايه *

*اشتغل شنو ، انا ما عندي وقت ، يومي كلو في الكوافير دا و اجي احط راسي وانوم !

_غبيه ! ركزي معاي حتفهمي يا رحمة ..

انتي خطيبك مش خليتيهو بتقولي ؟

*ايوا ....

_و كنتي متزوجة قبل كدا ومتطلقه ؟

*ايواااا

_مشكلتك فهمتي و لا مافهمتي !