الجزء 49

رجعت التلفون لمدام سارة و دخلت الحمام .. و قعدت ابكي ... ابكي ، لمن راسي داير يطرشق ،من الضيق ... غسلت وشي وطلعت ، انشغلت بي زباين ،، لحد جا رقت نطلع ،

بعد لبسنا ، نادتني و ادتني 1800د .. شكرهتا ، و طلعتاااا ..

( في بيتنا )

امي : منو الفي الباب يا يمنة ؟

يمنة : ههههههه كيفكم ، اشتقت ليكم ، خالتو كيف حالك !

مريم : معانا حسام يا يمنة ، اللبسي طرحه

يمنة : اااا ، دقيقه دقيقه .....جرت جوااا

يا امي .... امي ... ديل اخواتي جو معاهم امهم و و احد ...

امي : طيب !

امي : السلام عليكم ، اتفضلو واقفين مالكم ، كيفكم تمام ...

ابتسام : حمدلله ( بي خجل )

امي : تعال يا ولدي اتفضل !

حسام : لالا انا جيت اوصلهم بس ، و معليش على الازعاج و انا اسف ..

امي : اجي يا ولدي تتاسف على شنو ؟

حسام : على حاجات كتيرة يا خالتي اعفي لي ..عمتو ابتسام ، انا ماشي لو احتجتو حاجة كلموني !

ابتسام : شكرااا ليك

حسام : مناهل ! عايزة حاجة ؟

مناهل : لالا سلامتك

حسام : يلا سلام .... سلام ....

امي : قومو من هنا ادخلو جوا ، طوالي البيت بيتكم .. ابتسام ، ما تتعقدي الحصل قبل كدا حاجة واسي حاجة الدنيا ماشه ما بتقيف و الله ما يجيب مشاكل ، انحنا في وضع اهم ، و دا بيت اولادك ، و خليها على الله ...

ابتسام : دا العشم برضو ، فيكي الخير ...

امي : قومو يا بنات ، قومي يا مناهل مش وريتك الغرف انا !

مناهل : طيب يا امي !

يمنة : شرفتونا والله ، مبسوطة بي جيتكم دي شديد ،، اخيرا حتقلونا بدل قاعدين برانا ..

ابتسام : يا حليل رحمة الحنينة ، الله يحفظها وين ما تكون ...

كلهم : اللهم امين يا رب ...

انا رجعت البيت ، و بضرب في حساباتي ، و اذا حولت القروش دي لجنيه سوداني حتعادل كم، ولقيتها ناقصة كتير !،، شلت تلفوني اتصلت علي سيدة :

*سوسو كيفك ؟

_حمدلله

*نايمة ؟

_لالا مريحة شويه ، مالك ؟

*سيدة انا محتاجة قروش، عشان ابوي ، و المحل رفض يسلفني اكتر من راتب شهر ، و ما بيكفي محتاجة زيو تاني و يمكن اكتر ، عليكي الله يلفيني و اشتغل واردو ليكي !

_حبيبتي روقي كل شي بيتحل ...

*معليش انفعلتا ..

_لالا عادي ،بس انتي عارفه انا كنت في اجازة قريب السودان ، و خلصت قروشي كلها في السفر و طلبات البيت !

*اها ،،، فهمته ...طيب الشغل ما بيسلفك و انا اردها ليهم ؟ّ

_صعب والله حبيبيتي كان نفسي اساعدك ..

*ولا يهمك بتدبر ...

_بشوف من صحبي الركبنا معاهو بيوافق ، بس اكيد بكون داير مقابل ..

*ياخ موافقه بس يديني ، و انا بسد والله اسد بشتغل و اسد ليهو ...

_اممم تمام طيب ، بشوفو اكلمك

*حتردي لي متين ؟

_بشوفو اسي ..

*منتظراكي ...

( في بيتنا )

مريم : يا مرحب

يمنة : منو جا ؟

مريم : ااا( بي دبكة) مم بعرفو !

يمنة : اااا متوكل هه تعال ادخل ،كيفك

متوكل : لالا من الباب ياداب راجع جيت اشوفكم لو محتاجين لحاجة ..

يمنة : دقيقه انادي ليك امي طيب

متوكل : شكلكم مضيوفين ، خليها بس شوفو بكرة حنعمل شنو بخصوص عم محمد عشان اقدر استأذن من الشغل و اجيكم .. و اتصلي علي ..يلا انا بحرك ..

يمنة : دقيقه ، ما ضيوف دي مريم اختي ، الصغيرة ، بينا سنة ، و في مناهل جوااا ..

متوكل : يا هلا مريم ،ااي انا لاقتني التانية ايام الجزارة متزكر ... يلللاا م تنسي ..

مريم : عيونها دي عايزة تطلع قلوب ، واقفه فاتحة خشمها و متنحه مع متوكل !

يمنة : تمام يلااا ،كلم اختك ترد على الواتس

متوكل : يلا تمام مع السلامة ...

مريم : حييي كان تخليهو يدخل ، دا منو يا يمنة ؟

يمنة : مالك قال ! دا متوكل #السند بعد ابوي ، اكتر من اخونا وشايلنا فوق راسو ، وهو مجرد واحد كان بشتغل مع ابوي .. و.... ولا دي امور شخصيه م بتكلم فيها ..

مريم : الشنو احكي لي !

يمنة : خاص برحمة م بحكي ... يلا نجهز العشاء ، بكرة عندنا طلبيه و في ضغطة ..

مريم : طيب ...

، اتصلت علي سيدة ، قالت لي :

_بصراحه كلمتو و مبلغك دا بيتصدق بيهو عادي بالنسبه ليهو ، و ا بيقبل ترجعي ..

*يلقى قدام الله يسعدو و يفتحها عليهو يا رب. .

_بس بصراحه ! اااا

*شنو ؟

_عندو طلب ، وانتي قلتي بتوافقي

*اكيد لو بقدر ما بقصر

_اممممم قال دايرك

*كيف يعني ؟

_عديل ، معجب بيكي قال ..

*معجب بي انا ! بعرفني من وين عشان يعجب بي !

_رحمة م بقدر اشرح ليكي بس ، الوضع هنا ما زي م انتي متخيله ، و احيانا الواحد بيضطر يضحي و ....

*تقصدي شنو انتي ؟

_بكتب ليكي رساله انا ما بقدر اقولو ليكي ..

*طيب ، اقفل ولا كيف ؟

_ايوة .....

قفلت مننها ، و شفت الرسالة ! للاسف ، رسالة خلتني اكره نفسي ، اكره اني فكرت اطلب من زول ... انا ما بقدر اقوليكم بالواضح هو داير شنو بس اكيد انتو فهمتو و انا مستحيل اقبل بكدا !

كتبت ليها رساله ، قلت ليها ،، قولي ليهو قروشو دي يمشي يجيب بيها وحدة تعمل ليهو الهو عاوزو، انا ما كدااا و حمدلله بت ناس ... ردت لي بكرة لازم نتلاقى ..

و بكدا رجعت اتقفلت في وشي تاني ...

قمت صليت ركعتين ، و رقدتا

اتقلب ، يمين و شمال ...

لحد اليوم التاني ... قمت اتجهزتا ، و لبستا و طلعت اشتريت الشاي و الفطاير و طلعت المحل ..

بدت شغلي و انا قافله معاي ما فتحت خشمي مع زول ، و ظاهر فيني الضيق بس بشتغل بي غل ، و اتفشى ...

دخلت المطبخ ، بقيت واقفه محتارة في الاسويهو ... و قعدت ابكي مالاقية مخرج ابدااا ، ضاقت ...

جات مريم داخله بتشيل في حاجات من الدولاب حق التخزين .. بمسح في عيوني و قبلت وشي .. قالت لي :

_ليش تبكي ؟

*ما ببكي

_لا بتبكي في شي ؟

*(اتزكرت كلامها مع امها ) مريم ، انا محتاجة قروش سلف ..

_كم ؟

*ما بعرف بس مبلغ اقدر ارسلووو مع المبلغ المعاي !

_معي زباين برا ،شوفي عايزة كم و خبريني !

و طلعت ،، انا بقيت واقفه مصدومة ، معقول دي مريم الاستبعدتها تساعدني ؟

بقيت بأنب في نفسي ، .ان حكمت عليها و اخدت عنها فكرة كعبه..

رجعت اتفائلتا تاني ، و كملت شغلي ،، و انا شغاله لزيبونة ، تلفوني في جيب الينفورم بيرن ، ما قدرت امسكو الا اخلص ، خلصت منها عاينت لقيتا دي امي ، و اتصالها الكتير دا وترني شديد ...

دخلت لجواا ، و رديت عليها ..

*ايوا يا امي ابوي كويس ؟

_مالك ما بتردي

*في الشغل يا امي

_ابوكي كويس بس دايرة اسالك عن القروش

*و انا طالعه كان لقيت طريقه تحويل بحول ، بس اصبري قربنا ...

_طيب ،، لحد م ترجعي ، اقفلي تمي شغلك

*طيب ..

( في جانب بيتنا )

يمنة : يا امييييي ...امييي تعالي متوكل جا ..

جات مريم بتجري عاينت ليمنة من ورا الباب قالت ليها بجد جا !

يمنة : وانتي مشحتفه روحك مالك ( عديل قالتا ليها و متوكل واقف في الباب )

مريم : ساي مافي شي ....و صلحت التوب وقعدت في طرف الكرسي ..

امي :متوكل ، تعال ادخل يا ولدي !

يمنة :ادخل قالت ليك مالك واقف كدااا

متوكل : لازم نمشي المستشفى عشان اجراءت العمليه ..

امي : منتظرة رحمة ترد علي ..

متوكل : انا قدمت ل سلفة و اترفضت عشان لسه ما تميت معاهم وقت ، بس بتصرف باذن الله !

امي : لا يا ولدي ما تتسلف ربنا بيفرجااا

متوكل : دا عم محمد الغالي

مريم :بتحب ابوي شديد

متوكل : احم .. اكيد ( حس بتصرفاتها الغريبه وربكتها اللي ماليها اساس ) ..

امي : تعالي اكل معانا لمن تتصل

متوكل : لا انا بمشي البيت اغير ملابس الشغل و اتطمن على ناس البيت و اجي ..

امي : طيب اكل و امشي

مريم : اكل معانا

يمنة : ( عاينت لمريم ، بعين غضب )

متوكل : مرة تانيه يا خالتي ، يلااااا ...

امي : طيب يلاااا ..

بعد خلصنا شغلنا ...

مريم طول الوقت ماسكة التلفون و دايرة اتكلم معاها ، ما لاقيه طريقه ، وانحنا طالعين نسرين قالت لي .. الله كريم ، بس ما تاخذ شي من مريم .. قلت ليها ليه ، قالت لي اسمعي كلامي ، ما تاخدي منها شي .. و مشت ...

وبصراحه ما اديت كلامها اي اهميه ، ووقفت برا ،انتظرت مريم طلعت ...

قالت لي ها كم عايزة ؟ قلت ليها اللي تقدري عليه ما عايزة اضغط عليكي ، قالت لي لا الخير موجود حمدلله .. قلت ليها سلفيني. 5 الف .. قالت لي بس كذا ،، يلاااا

طوالي نزلنا ، و انا متجهه على السكن ، قالت لي وين رايحه ، قلت ليها حتجيبيهم من وين ؟ قالت لي ليش انا مجنونة اخلي فلوسي في السكن ، لا حبيبتي بنروح الصراف .. قلت ليها اوكي هنا قريب و لا بنركب ؟

قالت لي دقيقه ،،، قلت ليها في واحد في لولو ، و يسماركت ، قالت لي دقيقه في احد بيوصلنااا ..

سكته ، قلت ليها بقدر احولهم اسي ؟

قالت لي لا الصباح تاخذي تاكسي و تروحي بنك ال (...) لانه مبلغ كبير ..

قلت ليها طيب ... طوالي اتصلت على امي و انا واقفه ، لقيت رصيد مافي ... قلت بعد نرجع ..

جات عربية مظلله ،، مشت سلمت وركبت ، و انا ركبت ورا .. و بقت تتكلم معاهو مغربي على فرنسي و انا ما فهمت شي طبعا .. قبل علي عاين لعيوني كداااا ،، و قاليها جمله و دور العربيه ساقاها ...

حسب الاشارات الفي السكة ، عرفت اننا في شرق10، نزل هوّ ..

مسااافة ، و هي مدت يدها شالت سجارة من علبتو و ولعتهااا ، قالت لي بكرة تجي تحولي من هنا ! عسان تعرفي الطريق ، قلت ليها واضح ..

قام جاها بالشباك قاليها هي لو حتحول المبلغ الحين عادي في طريقه ، قالت لي انزلي معاهو ، طبعا جيت على نفسي ، و نزلت و هو ماشي و انا وراهو و ال 1800 معاي ، بقيت ما عارفه اختها مع الخمسه ولا اخليها معاي لاني باقي الشهر دا حاقعد من غير مصاريف ..

المهم وصلنا الشباك ، اداهو ارقام و قالي كلميه ، اديهو رقم حساب الحيستلم و كذا ، قلت ليهو معي 1000 حولها معاهم ، طلعت ال 1000 و خليت ال800 معي ..

عشر دقايق بالحسبه ، انحنا خلصنااا !

و انحنا راجعين ، كان في سوبرماركت ، قلت ليهو لحظة ، قالي وين ؟ قلت ليهو عايزة بطاقة ، قالي روحي السيارة .. قلت ليهو لا انا بجيبها .. ما رد علي و مشى !

رجعت العربية ، مريم قالت لي هاا خلصتو ؟ قلت ليهو ايوا شكرااا .. و كل شهر بديكي 1000 من مرتبي ان شاءالله .. قالت لي ان شاءالله ، وين رابح ؟ قلت ليها عايزة اجيب بطاقة ، رفض ، مشى يجيبها لي !

بعدها ، جا ، جاب لي ام

50د ،، ركب و شغل اغاني و ونسه وضحك هو و مريم ...

امي اتصلت علي ، و انا كنت ناويه اصل البيت واكلمها ، ما رديت عليها ، اتصلت تاني ، رديت عليها ...

*ايوا يا امي

_ايوا يا رحمة

*اصل البيت واكلمك

_صوت الاغاني دي شنو ؟

*انا برااا .. راجعه البيت

_سجمي ( البت دي في ديسكو ولا شنو )

*يا امي الله يهديك ديسكو شنو بس .. اصل البيت و اكلمك ،، يلااا ...

قفلنا ...