الجزء 56

مشيت من هنا و بغلي من جواي ، من اسلوبها و كلامها القالتو عننا ، و دايرين الصراحه كلامها جد ، الا من رحم ربي ، شرق8 عبارة عن بنات بالشكل دااا ،، و المحترمة دي ما محتاجة تقول انا محترمة ، ظاهر فيها من اسلوبها ،و كل ما افكر اني قلت ل سيدة موافقه على الشغل دا و اتزكر كلام مريم ، بكره نفسي ، و بكره الظروف الدخلت لي افكار زي دي ... الدنيا ضاقت بي شديد ، ما كفاية وضع ابوي و القضية المنتظراهوو ، كمان انا اترحل السودان واتحظر من الامارات و اتسجن في السودان !

لالالا مستحيل يحصل معاي كداااا، مستحيل انا لازم احقق اهدافي و ما استسلم ، لازم ارجع السودان عندي هدف كبير منتظرني ، لازم ارجع راسي مرفوع ، افتش شغل تاني ،

دخلت ، شلت الشاحن ، و جبت ملاية و فرشتها في الحوش و المخدة ، فرشته في الارض و وصلت شاحني ، و بقيت مقابله التلفون ، تاني رجعت لمرجان ، و بقيت برسل لاي اعلان القاهو .. اخر شي نزلت اعلانين ، واحد شغل واكس و شعر و مكياج للنو حاجاتي جايباها معاي ،و الاعلان التاني عن اني ببحث عن وظيفه طبعاً برقمي ،، بقيت قاعده كدا قريب الصلاة ..

و استمريت ارسل وارسل لمن الاذان اذن ، قمت صليت و دخلت نمته ..

تاني يوم الصباح .. ّ

في بيتنا ، جاا متوكل ، بيخبط في الباب زي الساعه 9 الصباح ..

امي فتحت ليهوو مخلوعه ، قالت ليهو في شنو ؟

قاليهااا جيبي البشارة ! قالت ليهو بشارة شنو يا متوكل انا براي مخلوعة من خبيطك في الباب ، حاصل شنو ؟

قاليهااا ، عمي محمد استجاب و فتح حمدلله والشكر لله ..

لمن حيلها ، برد قعدت في اقرب كرسي ، وبقت تقوليهو كذاب ، جادي عليك الله جد يا متوكل ! الحمدلله و الشكر لله ، الحمدلله الحمدلله ، يلا يلا لازم نمشي اسي طوالي وينو توبي ..

اخواتي اتلمو بصوت امي ، و خالتو ابتسام جات و ما فاهمين حاجة ..

متوكل قال لامي ، يا خالتي ما حيدخلونا اسي ، لانو في العنايه بس اتصلو بي انه استجاب بعد العملية و في تحاليل محتاجنها ولازم قروش زي ما عارفه ..

اخواتي قعدو يبكو و خالتو ابتسام قعدت تبكي ، و تقول لامي انا ماساعدتكم بحاجة بالعكس قاعده عالة عليككم و كل البلاوي دي بسببي لو ما عبدالله دا كلو ما كان حصل !

امي عاينت ليها و سكتتت ابت تتكلم لانو من جواها خاته انه فعلا ما عملت حاجة عشان ابوي ، هما الما عندهم خبرة في الحياة دي اشتغلو شغل ولا من مجالهم ، بس الظروف اجبرتهم و الحمدلله اتوفقو !

امي قالت ليهو طيب انا بمشي معاك نسحب باقي القروش ،، متوكل وقف زعلان شديد ، قاليها انا اسف اقسم بالله لو عندي ما كان ....قاطعتو ، قالت ليهووو

انت العملتو معانا دا ، لو كان عندي ولد ما كان عمل الانت عملتو معانا دااا .. انتظرني

قال ل يمنة ، اعملي لي سندوتش ،، قعدت تضحك قالت ليهو احلا سندوتش لاحلى متوكل في الدنياااا ، رايك شنو في سندوتش ديناميت !

قاليها :

*انتي عايزة تجربي فيني صح لالا شكرااااا

_هههههه والله لا انت ما عار*قاطعها ..

*يابت لا عارف لا بتاع احشي لي حاجة بعرفها ما تجربي فيني ، ديناميت و متفجرات حرام عليكي دا اسم زاتو ، يخلع ...

(اخواتي واقفات مناهل ومريم جمب يمنة ، يضحكو ساي )

مريم : على فكرة ظلمت يمنة ههه ديناميت دا سندوتش بكون مليان كل حاجة ..

يمنة : بيض مسلوق و طعمية و اسود و جبنة و... و....الخ يجيك الساندوتش منفوج هههه ..

متوكل و ههههههه كان سمو منفوخ ما كان اخير من الديناميت داا هههه ، يمنة انجزي ورانا مشاوير .

يمنة : طيب طيب ..... مشت

مناهل : متوكل كيف اخبارك تمام ؟

متوكل : حمدلله بخير والله ، وين من ديك و عييك هههه ..

مناهل : ياهو والله زي ما عارف برنامج خطوبة وعرس و غير كدا المسافه بعيدة بقت ..

متوكل : بعيدة والله ، يا زوله ربنا يسهل الامور كلها ..

مناهل : اللهم امين يارب ... عن ازنك ...

متوكل : اتفضلي !

(مريم واقفة)

متوكل : مريم كيفك ؟

مريم : الحمدلله ، و يا متوكل انا اسفه للمرة التانية ياخ انساها لي عليك الله ..

متوكل : يا بت ما حصل شي خلاص انا نسيت انتي انسي كمان ..

مريم : تسلم ...

( في جانب اسعد )

*ما بزعلك تاني ..

_جد ؟

*ايوا جد بس انتي بطلي النقه ، النقه الكتيرة دي البتطفشني منك يا اسماء ..

_حبيبي ، الله ما يحرمني منك ، طيب حنرجع متين ؟

*المساء انا حاجيكم في البيت

_الله ما يحرمني منك و يجازي الكان السبب

*ما بتسوى ضفرك صدقيني ، اسي انا عرفت قيمتك ..

_لفيت و رجعت لكلامي ..

*انتي صح يا قلبي ، يلااااا ارجعي البيت عشان تجهزي..

_طيب ،، يلاااا ...

اما في جانبي انا .. اتصلت بي مدام عبير ..

*السلام عليكم ..

_وعليكم السلام ، وينك عن الدوام اليوم ؟

*ما جاية !

_عفواً .. كيف ما راح تجي

*السمعتيهو ، ما ج ا ي ة _ بلهجتكم ما راح اجي ، عايزة حاجة ؟ عشان حأقفل ( طبعاً ضمنت جوازي في يدي و الله اتفشى ما اخلي حاجة في خاطري )

_شنو الاسلوب السخيف اللي بتتكلمي بيه دا ؟

*مقارنة باسلوبكم معي ولا شي ، ولا المقامات بتفرق

و بتسمح لكل واحد يتكلم على كيفوو ؟

_لا انتي ما طبيعيه و قرار رفدك كان صائب

*صائب ! لمن تقطعي رزقي و تجيبيني من السودان باتفاق بينا انتي ما احترمتيهو و لا بقيتي قدرو ، و دبستيني انا و خليتيني اتعشم ، و فجاة رفد من غير اي اسباب منطقيه ، سبتي كل افعالك و مسكتي في اسلوبي ، اسلوبي دا ولا شي بالنسبه للسويتيهو انتي !

_رحمة انا ما عايزة كلام كثير ، اليوم محسوب ضمن اخر شهر ولازم تداومي ، والحين الساعه 3 ..

*ان شاءالله الساعه 100 ، تعالي اجبريني اشتغل و انا لسه في السكن ، حانتظرك تجي تجبريني ، و كان دايرة تجيبي الشرطة جيبيها .. *طق قفلت فيها الخط !!

بردت قلبي من القهر الكان جوااي ،، طوالي لملمت حاجاتي ما خليت لي فردة شراب براا، لي اكلي دا شلتو معاي ..

بقيت واقفه على اتصال من سيدة ، قلت بدل اقعد في الغرفه ، افضل انزل المول اللي جمبنا اشوف يمكن ربنا يفتحها علي ..

شلت تلفوني و مفتاحي و طلعتاا .. مشيت المول اللي جمبنا ( ما لولو ) ..

دخلت محل محل ، بسال يقولو مافي مافي ، اخر شي ، في واحد وصف لي مول اسمو يسماركت .. ركبت تاكسي ، وصلني ، نزلت و بقيت افتش م لقيت اصلا مكتب اداري اسألوو ، طوالي طلعت .. لمن لقيت الواطه مغربت ..

اتصلت على سيدة ، التلفون #مغلق

قلبي نغزني و ما ارتحت ابداً ، بقيت بغالط في روحي انه شبكة ..

رجعت مرة و اتنين و خمسه ، المرة التاسعه قنعتا ، و اتخذلت في طوق النجاة الوحيد الاتوسمت فيها الخير بكل ما اوتيت من ثقه !

ركبت التاكسي ، و رجعت شرق8 ..

ما عارفة امشي وين مفروض اطلع من السكن اليوم دااا ..

رجعت اتصلت عليها ، دخل معاي جرس لمن ختيت يدي في قلبي من الفرح و منتظراها ترد .. ما بترد ، اتصلت تاني ، كنسلت علي ..

قعدت شوية قلت 100% حترجع لي هي ..

و بقيت منتظرة ...... الخ ..

( في جانب متوكل )

*والله الضخكة عندك يا صحبي

_هههههههههههه والله مبسوط داير اطير ، اسمعني يا متوكل ، انت شركتكم دي ما دايرة موظفين ادارين ؟

*والله ختمو بي ، لكن غريبه مالك بتفتش شغل و انت شغال !!

_داير شغل اضافي ، يعني انا بشتغل من 8صباحا لحد الساعه 3:30 ،و باقي اليوم فاضي ..

*و انت داير تهلك نفسك يعني ، البعرفو انك مبسوط كنت بشغلك دا وانك متفرغ للشباب و النادي اخر اليوم !

_اي دا كان زمان لكن اسي لازم اشتغل و اجتهد لازم شغلي دا براهو ما حيكفي ..

*ما حيكفي شنو يا زول انا والله بقيت ما فاهمك يا محمد ...

_ياخ بصراحه ! سر ابتسامتي و فرحتي دي ، ياها بت الجزاررر ، من لاقيتها و حاسي الدنيا ياداب بقت لي دنيااا .

*كيف يعني لاقيتها مجنون انت يا زول لاقيتها وين ؟

_مالك عصبت كدا ؟

*يا زول دي اختي و ما برضى الكلام دا حتى لو كنت صحبي ..

_متوكل انت عارفني ما زول امور و لعب و لاقيتها امبارح بالصدفة ، قريب للشارع الرئيسي كانت شايله حاجات ساعدتها وبس ..

*اممممم تمام

_مالك انت اسي !

*مافي شي ، بس اوع من الغلط اكرب نفسك و انا بخدمك بعيوني ..

_كلامك دا زي الما بتعرفني ..

*معليش يا صحبي في مواضيع حساسه و البنات ديل انا مسئول منهم لمن ابوهم يبلغ الصحه ...

_ربنا يواليه بالعافيه ...