الجزء 60

*ايوا بصراحه محتاجة مساعدتك و ما في زول قدامي غيرك ممكن الجأ ليهو !

_خير يا رحمة قلقتيني ! احكي !

*انا من امبارح بايته في الشارع ، لولا ان ربنا وقف لي زول ساعدني و الموضوع طويل شديد يا مؤيد ..

_بايتة في الشارع كيف الكلام دا ؟

*ااي ، دا الحصل و انطردته من الشغل فجاةو وضعي كعب شديد ، فا ما لقيت غيرك ممكن الجأ ليهو ، اعفي لي انا بطلب منك كدا وانا ما بعرفك بس اتوسمت فيك الخير ..

_اسمعي رسلي لي اللوكيشن حقك على الرقم دا زاتو ..

*ماعندي نت ..

_طيب انتي وين اسي ، وصفي لي بتعرفي ؟

*ايوة ، في بني ياس شرق8 ...الخ ..

_لاحوووووول ! ياخ بني ياس !

*اي ، انت بعيد ولاشنو ؟

_صراحة في ابو ظبي ما بعيد شديد ، بوصلك ان شاءالله ، اقعدي في حته كويسه مسافه اوصلك ..

*شكراً ليك يا مؤيد ..

_يا ستي ، ما بينا ،، اقفلي اقفلي انا اسي متحرك يلااا ..

*تمام ...

ما اكذب عليكم ارتحت شديد ، والله ،، حسيت بي بشاير خير !

( في جانب بيتنا )

كانو طالعين ماشين المستشغي ، و يمنة و متوكل بتونسو بتقوليهو وينو القلت لي عليهو قاعدة جعانه غدا و ما اتغديت .. !

في اللحظة دي جو اسعد و اسماء ، البسوفهم يحلف يقولو عرسوو اسي دي ، اسماء التوب والحنة والريحة ، كأنها بتقوليهم شوفوني ، و امي جات طالعه و معاها خالتو ابتسام ، مناهل و مريم قعدو في البيت ،، امي شافتهم بعفويه قالت ليهو اسعد ولدي كيف اخبارك ..قاليها شوفة غينك مبسوط و متهني حمدلله ، اسماء قالت ليها ازييك يا خالتوو ( بي مياعه )اخبار بتك الحلوة سنو لسه مطلوقة في الاماراااات هاهاهاي ...ّ

يمنة قالت لاسعد : ما عندك رد طبعا يا جردل صح ! من يوم يومك شخصيتك في الواطه ، و فعلا حلة و لقت غطايتا ، شبهك ..

اسعد : احترمي نفسك و لو ما عشان خاطر عمي و امك الواقفه دي كان جيت ادبتك ..

يمنة :الادب بجي من اهل الادب لكن علاقتك شنو انت بالادب ! ادب لادب اولى بيه مرتك ،

و بعدين يختي انتي اخر من يتكلم عن الادب ، و ادبنا و تربية امي و ابوي دا المسكتني ..

متوكل : يمنة ،كفاية لو سمحتي ، احفظي لسانك ..

يمنة : انت ما شايفهم بقولو في شنو ، هما اليحفظو لسانهم ما احنا ..

متوكل : انا بعرفك انتي ما بعرفهم هما ، و اكيد ما من الصح ، اقيف قدام راجل زي و اقوليهوو دا صح و دا غلط ،واحد بدل يجي يقيف فوق راسكم يشوفكم محتاجين شنو ما محتاجين شنو وهو عارف الظروف الانتو مارين بيها ، يجي يقيف وراااا مررررة ! زي دا ما بيتكلمو معاهوووو ...

امي :لاحول ولاقوة الا بالله .. ابوك راجل فاضل والله يا اسعد وانت زول ممتاز لكن ما عارفة العيب وين يا ولدي ،،

اسعد : انت منووو عشان تتكلم بالطريقه دي معاي ؟

متوكل : خير بتكلمني انا ؟

اسعد : في زول غيرك هناااا ..؟

متوكل : امششي امششي اقيف ورا مرتك ضلة ،، يلا يا خالتي ، يلاااا كان جاهزين ، البنات ما جاايين ؟

يمنة : لا قالو م جاين ..

امي : كيس ابوكي وين ؟

يمنة : اديتو لمتوكل ختا جوا العربيه ..

اسعد واقف داير ينفجر من الغيظ ، والاهانه الهو فيهااا ، بالجد اسعد دا من الناس الكنت بكن ليهم احترام ، و من موعية الناس اللي تحترميها من بعيد من غير ما تتعمقي فيها ، عشان حيخيب التوقعات !

بعد ماس امي اتحركووو .. اسعد قال لاسماء : *انا سكت ليهم عشان م احرجك قدامهم بس كيف تتكلمي مع اهلي بالطرقة دي ؟

_قلت شنو انا ؟

*شنو مطلوقه دي ؟

_براك قلت ما بتسوا ضفري ..

*اي بس ما تبشعي بيها قدام اهلها

_دي الحقيقه !

*الحقيقه ! اسماء ، نسيتي نفسك ولا شنو ؟ نسيتي الحصل بينا و الكنتي بتعمليهو لي عشان يحصل الحصل داك ؟

نسيتي يوم عرس اخوكي يوم السونكاب ولا ازكرك و لا القبلو والقبلو ، و ما تفتكري اني مستبعد تنك تكوني عملتي كدا مع غيري ! لا ما مستبعد و رخصتك دي الكرهتني فيكي نفسك ما عزيزة عليكي !

عكس رحمة ، رحمة عمري ما شفت منها غلط و انا وراجلها و ما رخصت لي نفسها فما بالك وحدة ف مكانك وعملت كدا !

_انت اسي بتزلني ولا كيف ولا بتجيب لي الفات لشنو ؟

*لا بزكرك بس ...

(ملحوظة)

الراجل عمرو ما حيحترمك وامتي بعتي نفسك حتى لو هو سعى يعمل معاكي العلاقه دي ! ولو اتزوجك دا رغم انه شبه مستحيل ، حيفضل يزلك طول عمرك معاهوةو وحتوصلي معاهو لباب مقفول ،وحياتك كلها حتكون نكت و مشاكل ..و ما ناسية الثقه الحتنعدم طبعاً ،و اقل تصرف منك حيربي ليهو هوووس انك بتخوني ، انك عملتي مع غيرو زي ما عملتي معاهوو...

الدنيا دي عبارة عن معادلات ، التسوي تلقي ..

المهم ، عندي مر الوقت ،زي ساعه و نص و انا منتظرة مؤيد ! لحد ما اتصل علي .. قالي انا جمب لولو ( لانه على الشارع ومعلم ظاهر) ..

قلت ليهو انا ....*** جمب محل ال....***

اطلع ليك ؟

قالي لالا ، بوصلك ، خليكي ، انا جمب البقال ، وين البقالة منك ؟

قلت ليهو بس مكانك .. ! ، لفيت ناحية الشارع ، الواقف فيهووو ...

بقيت ما عارفه العربية ،، فجاة لقيت في باب عربية بيفتح ، و جايني زول لابس جلابيه و قطرة ، و زي كامل .. و

لابس نضارة شمس سوداا و شبشب !

اصلو ما اتحركت قلت دا ما هو اكيد ..

مسكت التلفون ،، رنيت عليهو ، لقيت تلفون الزول الابس ثوب دا بيرن و هو جاي علي !

( في جانب ناس امي )

متوكل : اسي انتي صارة كدت مالك ، حنمشي المستشفي حتدخل لعمو محمد صارة كدا ! وياخالتي مالكم نتو ؟

يمنة : كل دا و مالنا ما اتفشيت انا يا متوكل حرقت دمي ، والله لكن هي آخر من يتكلم عن قلة الادب ، انا المسكتني الشديد القوي ..

امي : يمنة ، خلاص عليك الله ..

خالتو ابتسام : ما عرفتها البت دي ؟

امي : مافي صلة قرابة بينا ..

يمنة : لو في صلة قرابه كان قطعتها و اتبريت منهااا ..

متوكل :ياخ خلاص ، ليه تحرقو في دمكم كداا ، انسونا منهم ، و اسعد دا انا ماعارف طينتو شنو صراحه بني ادم غريب والله ..

امي :ما كان كدا صدقني. ..الولد دا متربي تحت عيوني ..

متوكل : صفات الرجولة ما بتتغير يا خالتي مهما حصل الراجل راجل ، كان اتغير يتغير للاحسن لكن ما يبشع بنفسه كدا ، ياخ معقوله اتدسى لي ورا مرة ، دا ككلام !

يمنة : و ياتو مرة كمان ، هه حمدلله والشكر ..

بعدين تعال هنا ! حيدخلونا لابوي الليله يا متوكل ؟

متوكل : قالو كدا والله اعلم ، ان شاءالله يدخلونااا ..

يمنة : ياسلام ، ابوسو عادي ؟

متوكل : لالالا من بعيد ،كدي يدخلونااا ..

يمنة من جواها اصلاً زعلانه من اخواتي الما جو معاهم ولا حتى كلفو خاطرهم يجو يتطمنو على ابوي ،، خاتين قلبهم في موية باردة كانو ابونا برانااا ..