الجزء 63

بس خالتو ابتسام سمعتهم و اتلفتت ليهو

مسافه تعاين بس يمنة سبقتهم الاتنين ، وجرت ....

امي بقت تكورك ليها ، يمنة انتظري ، يمنة اقيفي ...و متوكل كان مع الدكتور في اللحظة دي !

يمنة وقفت قصادو ، و قالت ليهو :

*جاي المستشفى و ما قلنا حاجة ، بس تجي في الدور المرقدين فيهو ابوي و تقيف عيني عينك كدااا ! انت طيننتك شنو من البشر ؟ هااا خليك من ابوي الما بتمسك بيهو اي صلة قرابة ، فهمني قلبك دا طاوعك كيف ترمي اختك لحمك و دمك في الشوارع لا ومعاها بنتين ! انت عايش كيف !

_انا ما جاي عشان اتناقش ولا اتكلم ..

*يبقى جاي عشان تتلطش.. (و مع رفعة يدها جا متوكل مسك يدهااا ) ....متوكل ! فكني دا واحد تافهه ، دا التفاهه زاتا ..

متوكل : راجل كبير مهما كان عيب تمدي يدك ..

*هو شنو عيب عيب عيب ، العيب دا ما بجينا الا احنا ! حرق دمي الله يحرقووووو بكل وقاحة جاي ..

ابتسام : داير شنو يا عبدالله !

امي : حسبي الله و نعم الوكيل فيك ،حسبي الله فيك من اسي لمن تموت يا عبدالله ..

عبدالله : عايز اتكلم معاكي يا ابتسام ..

ابتسام : تتكلم معاي في شنو ! ما عندي حاجة تاني اديك ليها ، العندي كلو شلتووو ، ما كفااااك ؟

عبدالله : انا ما جاي اتناقش ولا اتشاكل ، انا بس جيت حبيت اوريككم ان القضيه اتقفلت !

امي و يمنة بصوت واحد : اتقففففلت !

يمنة : يعني انت الورااا الموضوع دا كلووو ،بتعترف هااا ما حرام عليك ! استفدت شنو اسي فرقتنا كلنا و بهدلتنا الله يحرقك و ينتقم منك ..كان تبقى راجل و تخلي القضيه معلقه و تواجهنا في المحكمة يا راجل يا جبان ،خفتا صح ، عرفت ان الحق مصيرو يظهر ،وربناا دا ما بينوم زول مظلوم و حقو رايح الا لخييير ، البعملو ربنا انو بيأجل وقت الحقيقه لوقت هو بشوفو افضل و بيختبرنا ، كان تبقى راجل يا جبان .. تفوووووو عليك ، لكن و ديني و ايماني ، حق ابوي اجيبو من عيونك و اعتبرو وعد قدام الناس ديل يا عبدالله ، اسمك دا خسارة فيك تفووو ..

امي : حسبي الله و نعم الوكيل .. حسبي الله

ابتسام : اسي استفدت شنوو ؟ ( بتبكي) من البداية كان توريني عديل انك داير حقي انا و المرحومة ، كان توريني ، بدل البهدلة دي ، للاسف الحصل يا عبدالله حتفضل تدفع تمنو طول عمرك ..

متوكل : يمنة خالتي يلااا ، خلونا ندخل ، و رجع اتلفت عاين لعبدالله ، قاليهو و هو مادي ليهو صباعووو.. مش انت قفلت القضية دي ؟ انا الحأفتحهااا .. ابقى قدرووو .... يلا خلونا ندخل .... يلاااا يمنة ، خلاااص ..

يمنة :حيوان ...

متوكل :خلاص قلنااا ..

يمنة : لا ما خلاص ، بجاحة ، انسان بجح .. ولو ما ابوي و رحمة اختو دي زاتا تمش تحصلو غير البلاوي م جايبين لينا ..ّ

متوكل : يمنة (بهرشه) عيب و بعدين وطي صوتك ، هي مظلومة زيها زيككم م صح تقولي كلامك دا امك لو سمعتك انتي عارفه ممكن تزعل منك هي براها متحملة الوضع الحاصل بالعافية ...

يمنة : استغفرالله العظيم ... يا الله .. ندخل كلنا ولا زول ، زول ؟

متوكل :نشوف اسي .. تعالي ..

(في جانب شيماء صحبتي لو متزكرنها )

_رسلت ليها في الواتساب

*اها !

_بس ما ردت ..

*انا زاتي برسل ما بتستلم شكلها م عندها نت ...

_مقلقة عليها يا شوشو و انا متاكدة هي حتكون زعلانه مني و مفتكرة اني يتهرب منها ، ما عارفه حاصل عليها شنو ..

*يا سيدة انتي زاتك بتبالغي يعني ما عارفه تنتبهي لتلفونك ..

_غصب عني اتدفق في التلفون اسوي شنو ، اسي الا بكرة امشي المحل ،،، و .....

*شنو كملي !

_بصراحة رحمة خلت الشغل و ما عارفه هي غيرت شريحتها ورقمها ما اظن معاهم و الوضع جايط شديد يا شوشووو ...

*كيف الكلام دا و اسي هي وين ؟

_كانت منتظراني في الشارع !

*يا الله ........ ياربي حاصل عليكي شنو اسي يا رحمة ، و ليه طردوها ؟

_مفروض تحكي لي لمن نتلاقى و ما اتلاقينا زي ما عارفه .. م عندي طريقه الا تفتح واتسابها لانو برقم السودان لسه ،، دا الحيوصلني ليهااا ..

*يا الله .... انتي عارفه انا اجلت عرسي بسبب رحمة .. لازم تحضر و منسقه وقتي ، لمن تجي السوددان ..

_كدي نلم فيها يا شوشو اول ..

*يا رب ... سوسو. . ما شاءالله جيت ماشة جمب بيتكم ، شايفه اهلك بيبنو دور تالت و غيرو لون البيت و البيبان ولا الزراعه ، البيت بقى فلة عديل منو الما بتكلم عنو ماشاءالله ، من وين القروش دي يختي ، و انتي متغربة سنة ما تميتي !

_قولي ماشاءالله ..

*قلتا و عيني باردة ، تاني ماشاءالله .. ربنا يزيدك يختي ..

_امين ..

*ما وريتيني شغاله شنو ؟

_اااا انا ! اااا .. امممم م مندوبة في شركة وكدا و بدوني علاوة وكدا يعني حمدلله مرتاحة ..

*الا كان مندوبة ممنوعات ..

_يا ساتر منك .. يلا مع السلامة ّ

*ما وريتيني نازلة السودان متين ؟

_لسه ما عارفةة !

*تمام ..

في جانبي !

لسه في العربية كنت قاعدة منتظرة متوكل ، جااا بيضحك للضرس الاخير !