الجزء 67

فجاة جاتني صحية ، رفعت راسي اشوف الساعه كم ، عشان لو مواعيد الصلاة جات ، اصلي ! فجاة مع حركتي ، شميت ريحة مؤيد فيني ! ، قمتا ناطه ، عاينت لقيت الريحة في ملابسي عند صدري !

و مافي جمبي زول ، اتلبشتا بقيت رايحه جاية ، لبست توبي ، و طلعت الصالة ، لقيتو نايم في الكنبه ، والتلفزيون فاتح ..

بقيت محتارة الريحه دي جاتني من وين ، حتى لمن نمته المخدة ما كان فيها اي ريحه .. المهم ، اتقاضيت عن الموضوع ..

و رجعت تربست الباب ، و رقدتا و اتغطيت ..

نمته ،و صحيت بصوت الباب زي الساعه 7 صباحا مع وقت صحيتي ..

لبستا توبي وغطيت وشي و فتحتا ،، قالي

صباح الورد على البت الحلوة !

قلت ليهو صباح النور ، و دققت في 'الحلوة' القالها دي !.. قالي الدوام ، الليله نص يوم ، يادوب الحق امشي .. بقيت بعاين ليهو و مسهمة كدااا .. فتح دولابو بيطلع في ملابسو ، طوالي انا طلعت براا ، مشيت الحمام ،و من الحمام مشيت المطبخ ، طلعت بيض وجبنيه و زيتون. وشاي .. عملت فطور و ختيتو ..

و طلعت براا .. قلت ليهو ، الفطور يا مؤيد ، قالي بلبس دقيقه .. انا قعدت في الكرسي ،وهو بيتكلم من جواا الغرفه بيقولي ، طلعي لي الc.v عشان اشيلو معاي ، و على فكرة ناس الموقع ردو و قالوو عايزين يعملو معاكي مقابلة ، المساء كدا ، لكن انا بجي العصر نمشي نتغدا و نطلع عشان مشوار من هنااا .. قلت لبهو تمام.. قالي مالك م متحمسه ، قلت ليهو بدل جايط كدا انتظر بعد تطلع من الغرفه نتكلم ..

بسوط في كباية الشاي لقيتو جا طالع ،رفعت راسي و صلحتو على وشي ، لقيتو واقف ماسك قميص و تشيرت قالي دا ولا دا ؟ قلت لبهو مش ممنوع تداوم غير بالجلابيه ؟

قالي الليله نص يوم عادي بلبس بنطلون و كدا ، قلت ليهو القميص ظريف ..

قالي خلاص ، طالما عجبك بلبس واحد تاني و دا بعدين بلبسو لمن نطلع .. قلت ليهو تمام .. فعلاّ لبس و جا قعد يفطر و كلامو كان كتير على غير العادة ، ما بيفصل ، بيمسك موضوع ورا موضوع ، اداني احساس انه عمره ما اختلط بزول في حياتو ،و ما صدق لقاني ، زي الشافع العندو قصص كميه و عايز متين امه ولا ابوه يجو عشان يحكي ليهم ..

انا بقيت قاعده مستعمة ، و متابعاهو ، مستغربة فيهو ما عارفاها عفوية ولا شنو ،و بيقول انه اتاخر على الشغل ، في حين انه لسه قاعد يرغي و يتكلم ...

لحد ما اتصلو عليه ، قالي السي في شفتي نسيتيهو ، قمته دخلت الغرفه ، فتحت شنطتي ,طلعتوو واديتو ليهوو قلت ليهو سوي لي منو نسخه ، م عندي ..قالي تمام يلا قفلي الباب كويس ولو احتجتي حاجة دا رقم البقالة التحت (ورقة ملصقة جمب الباب) اتصلي بالتلفون دا (الارضي) هو بجيب ليكي لحد عندك ،و انا بحاسبهم تممام ؟ّ

قلت ليهو تمام ، قالي بتعرفي تطبخي ؟ قلت ليهو اكيد ،، ( فرح) قالي نفسي في اكل بيت و استبعدت انك بتعرفي ، طيب ممكن نتغدا في البيت الليله اعملي اي حاجة حاباها و زي م قلت ليكي البقال حتى الخضار عندهم ..

ما عارفه ليه انبسطتت ، قلت ليهوو من عيوني ، قالي عيون النفسي اشوفهم كويس ديل ! ،، طوالي زحيت و مشيت قعدت محل الفطور و بقيت بنقد و بشرب في الشاي ..

هو طلع ...

( في بيتنا )

امي ، بتقول يا يمنة افتحي الباب !

يمنة : اي بلبس في التوب خليكي انا بفتح ..

مشت على الباب و كانت المفاجأة ، عبدالله ، يمنة مع فتحت خشمها قاليها انا جاي و داير احل ، نادي لي امك و عمك الفاضل و ابتسام اختي و البنات ...

عاينت ليهو بكل قهر ،لدرجة فكرتا بدل انادي امي ادخل المطبخ اججيب لي سكينة اسلخو بيها ، بس لولا رب العالمين ، و متيقنه حقنا بيرجع دبل ..

امي : منوووو الجا ؟

يمنة : اللبسي توبك و تعالي يا امي انتي و خالتي ابتسام ، اما حامشي اشوف عمي واجي ..

امي : في شنو ان شاءالله خير ..

بعد رحمة طلعت الشارع اتصلت على متوكل ،كلمتوو ان عبدالله جا وكدا .. قاليها انا جاي .. طبعا عمي ماخد موقف بس ما زي اول ، لعل و عسى كل شي يتغير للاحسن ،و يعرف ان الدنيا ممر ،،

المهم ، اجتمعو كلهم ، لانور جا مع عمي و صالونا دا اتملا .. حتى متوكل جا دخل جوا ، تلقائياً انور مشى قعد جمبو ، و عبدالله قاعد زي البين قوسين .. و عمي دا حرف ما نطقو ، و خالتو ابتسام دي تشيل و تدعك عيونها بالتوب .. و مناهل ومريم واقفات في ريسين بعض _ يوسوسو ..

طبعا يمنة كانت م طايفه شوفة عبدالله ومنتظره عمي يسألو عشان يبدا يتكلم لانه م حينفع تبدا هي الكلام في نص الرجال ..

( تعالو عندي شوية)

نزلت براي البقال ،جبت الناقصني كلوو ، و خليت الحساب على مؤيد زي ما قال ..

جيت طبختا ملاح مشكل باللحمة و عملت معاها رز ، و سلطه خضار عادية ..

بعد انتهيت جيت اقعد كدا ، لقيت مؤيد بيفتح في الباب ، طوالي جريت الغرفه لبست توبي ، جيت طالعه لقيتو واقف وشايل معاهو كيس (لونو اسود يدينو بيج زي حبال التيل ، مكتوب عليهو اكل اليعجبك واللبس البعجبك برضو وقلب ) المهم التصميم روعه لفت نظري شديد ، قالي مالك ؟

قلت ليهو:

* مالي ، الساعه كم ؟

قالي اربعه ، شكلك ما طبختي هه اللبسي خلينا نمشي انا داخل استحمى واجي ..

* تمام ..

فعلاً دخل الغرفة ، خت الكيس في الدولاب و مشى استحمى ، انا دخلت ختيت الغداا و طلعتو برا في السفرة ، مسافة يطلع ، دخلت فتحت شنطتي ، طلعت لي عباية وطرحة ، و طقم من تحت ، و طلعت شنطة ابمكياج حقتي ..

سمعت صوتو طلع من الحمام، شكلو شاف الاكل ، قال يا سلااااااام ياخ منظر يشهي يا الله ، قالي يلا يا رحمة انا بديت غايتو .. قلت ليهو اكل انت ماشه اجهز عشان ما ااخرك ، قالي لسه بعد ساعه تعالي اقعدي اتغدي معاي ، قلت في سري ساعه بتكفيني ..

جيت قعدت ، ماشاء الله من النوع البيشكر من قلبه في الحاجة و بيقدر المجهود ، م نوعية الرجال التعملي ليهم حاجة يملو كروشهم و يقومو ، كلمة حلوة ساي ما بتسمعيها منهم ..

المهم خلصنا ، و قالي انا برفع الحاجات امشي انتي ، قلت ليهو تمام ..

مشيت الحمام اخدت دش سرعه ، و جاطه طالعه ماشه الغرفة ، ناداني قالي دقيقه ،، دخل قدامي الغرفة ، و طلع الكيس القبيل كان جواهو في كيس داك دخلو الدولاب و جا اداني دا .. قلت ليهو دا شنو ؟ قالي هدية بسيطة ، قلت ليهو بمناسبه شنو يعني ، قابي بمناسبة انك ماشه لوسط مختلف و تحدي والطلة بتلعب دور كبير ، دي عباية عجبتني شديد على ذوقي بالطقم حقها ...

( بصراحه كنت محتاجه لحاجة زي دي خصوصا اني بشوف منظر العبايات هنا يجنن ) سكته مسافه و قلت ليهو م كان تتعب نفسك ، قالي يلا اجهزي ..قلت ليهو تمام ..

دخلت الغرفة و قفلت الباب ،،