الجزء 7

قلت ليها ، انا لافة ساكت ، وريني دايرة تعملي شنو اساعدك ، قالت لي الحلل ديل ، شيلي الاتنين الوسط و اديني الاتنين الكبار ، حنوديهم محل الطبخ ..

قلت ليها : * يلاااا ، بس انتي مالك صارة كدا في حاجة زعلتك ؟

_ لا .....

* ما عايزة ازعجك ، بس عندي سوال في بالي بخصوص اسماء ، عادي اسألك ؟

_ قوولي

* عرفتيها كيف ما جايه عشان تحضر السونكاب ؟

_ عشان كانت حاجزة فوطة مع البنات ، و اسي هي لابسه لبس عادي ، حتى لو داخت و اسي فاقت ، كان كربتا و طلعت زيها زي باقي البنات ...

* اهاااااا ‏( حسيت بذكاء عمتو وجدان صراحة ‏) ..

كنت حاقوليكي يمكن ما بتحبها ، بس انتي قلتي انها اختارت وحدة ..

_ دا غير انه سونكاب اخوهااا ، يعني مفروض تشيل الناس ديل كلهم ..

* طيب يا عمتو وجدان ‏( ي جماعه اكرر وجدان دي ياها جارتنا و زوجة عمي و ام سماح واسعد و باقي اخوانهم لسه ما عرفتوهم ، بس انا بقوليها عمتي ، عشان نختصر النعت في باقي الاحداث ‏) ، مش مفروض ان السونكاب دا يكون في بيتهم ؟

_ مافي مساحة قدامهم زينا ، وبعدين الفرق بينا شارع ، يعني جيرانا واحد ، و دا كلام رجال عاد يا بتي انحنا ما بنتدخل فيهو ..

* فعلاً الفرحة وحدة يا عمتو ، خلينا نتحرك يلااا ...

_ يلاكي ، شريت النسوان بكونن قاعدات منتظرني ..

* يلا نحصلهم ، والله الليله التوب دا غايتو كان ما كفاني على وشي ما بحصل طيب ..

_ حلاة التوب فيك انتي بس الله يحفظك يا بتي ..

* تسلمي لي ... لسه خشمي فاتح من بعد ردي ، و انحنا طالعين من المطبخ ، القى قُصي ولد خالتي طالع من جمب الغرفة الكانت فيها اسماء ...... !!

لمن الحلل كانت حتقع من يدي ، حسيت بكتمة نفس ، عارفين انتو انا حاسه بشنو ! طيب شنو الجاب اسماء مع قصي ود خالتي يا ناس راسي حيطرشق ، لمن بقيت ماشه و بترتع ، لحد م طلع براااا ، و هو ما شايفنا،،

بس كتمتها في نفسي و سكتا !!

فات باقي اليوم على النمط دا ، المغرب اذن خلاص الرجال فاتو الجامع و رفعو ، و بقينا في زحمة الشغل ، ايقنت تماماً ان مستحيل اقدر اطبق عشان اقرااا ، فا الحمدلله ..

استمرينا كدا ، لحد الساعه 10:30 بليل امي و عمتي قالو لي بكرة عندك امتحان بعد دااا امشي ريحي و صفي ذهنك !

في سري قلت ، ياتت راحه دي ! ااااخ انتو ما عارفين حاجة ساي ، معقول !! العيبة تجي منك يا ود خالتي و يا اخوي !!

مشيت غرفتي اللي اصلاً م بقت

غرفتي ، جدعت مرتبه في الارض و خليت السراير للضيوف ، و نمتة نومة من ختت راسي ما جبت خبر الدنيا ..

بس صحيت بي وحدة من البنات بتضرب في رجلي بتقولي منبهك بيرن ... بقيت حاساها حلم حلم .. لمن زهجت قامت ضربتني شديد ، مع ضربتا دي انا قمت ناطة ، ياداب استوعبت ان المنبه بيرن ... قمتا ، فتحت الدولاب و جررري على الحمام، استحميت و شلت شنطتي و طلعتا حتى صلاة الصبح ما صليتا ربنا يسامحني غايتو ، كان باقي على الامتحان 32 دقيقة ، لحد ما اصل الشارع يا الله ، انا خلاااااااص حأشيل المادة دي ..

طلعت قلت اصحي ابوي ، عشان يوصلني ما لقيتو ، عرفتو حيكون نايم في بيت عمي ، طلعت الشارع بقيت مهرولة و شبه جارية و بتلفت ، و سمعت صوت تلفوني ، بقيت ماشة و بحاول اطلعووو ، لمن المكالمة فصلت !

لمن لقيتها فصلت طوالي خليتو ، وجريت على شارع الزلط ، منتظرة حافلة تجي ، طلعت التلفون عشان الساعه، لقيت باقي لي 28 دقيقه ، يا الله اسوي شنو اسي ، بقيت بأشر بس من طرف ، لمن فقدت الامل ، فجأة وقف لي ملاكي مظلل براهو من غير ما ااشر !

نزل القزاز ، قالي توصيلة ! قلبي اكلني

قالي يا اختي توصيلة ؟

لمن قالي يا اختي انا ياداب حسيت في هواء ممكن اتنفسو ، قلت ليهو والله انا عندي امتحان حيفوتني و ما لاقية مواصلات و ابوي ما *.... قاطعني !

قالي اركبي بما انك متاخرة ، كلامك دا زاتو حيشيل من وقتك ، قلتا في سري يا ربي اتوكل !

في لحظةقويت قلبي و قلتا مصلحتي اهم و دا اخر امتحان لي ما بضيعو !

فتح لي الباب الوراا ، ركبتا و دور ، قلت ليهو جامعتي ال ‏( ... ‏)

قالي بأذن الله حتحصلي ، قلت ليهو جزاك الله كل خير و سكتا ، و بقيت اهز في رجولي و اطقطق اصابعي من التوتر و كل شويه اعاين للتلفون ، من التوتر و التركيز في الطريق لمن تلفوني دا رن انا لمن قمتا مخلوعه وشهقتا و قع مني تحت ..

دنقرتا ارفعووو ... قام قالي بسم الله مالك ! قلت ليهو مافي حاجة ، رفعت التلفون رديت ..

* السلام عليكم ...

_ انتي وين ! انتي عارفه فضل كم على الامتحان ؟

* قربتا قربتا يا شيماء ..

_ يا الله انتي كيف اتاخرتي كدا افففف

* شيماء مليون مرة قلت ليكي ما تأف افي كدا حرااام ، وبعدين انا براي متاخرة غصب عني وضايقة بي عليكي الله ما تزوديها علي بس ما اقول الا الحمدلله على ما اراد الله ..

_ طيب انا مستنياكي ما حادخل ..

* لا طبعاً تدخلي ، يا شيماء عليكي الله ما تزهجيني ، انا ربنا معاي مافي شي حيحصل اكتر من الكاتبو لي الله ...

_ طيب انتي وصلتي جمب شنو عشان احسب معاكي ياخ طمنيني و ما تكوركي فيني ..

* انا في تقاطع ‏( ... ‏)

_ قربتي ، راكبة

شنو ؛

* شيماااااااااااااااء !!

_ خلاص خلاص يلا .....

* تمام ...

لقيتو بيعاين لي في المراية ! و عاقد حواجبو ، قالي

لقيتو بيعاين لي في المراية ! و عاقد حواجبو ، قالي :

_ عصبية !

* لا ابداً بس دا امتحان فاينل و خلاص يعني ، دعك سنة كامله انت فاهم ، و اجي اتاخر في الامتحان ، بالجد احساس ، حمدلله بس ..

_ عارف و انا ماشي بسرعه قدرتي والله ..

* كتر خيرك برضو ، نص العماء ولا العماء كلوو ، اعفي لي غايتو تعبتك و يمكن اكون انا زاتي عطلتك من دوام ولا مشوار ..

_ لالالا دي فرصه انا مبسوط بيها صدقيني !

* تسلم

_ مشوار ديني صراحه و عادي ملحوق في اي وقت ..

قلت بيني وبين نفسي ! مشوار ديني ! الصراحه هو شاب اللي هو قمحي كدا و ملامح وشو كانت اخر اهتمامي بسبب الوضع الكنت فيهو ، و كان لابس كلاسيك وكاجواال و حتى ما ملتحي لدرجة اقول انه ملتزم ، في النهاية اللبس ما عامل ! لمن حسيت انه سكاتي طال و مفترض ارد ، قلت ليهو ..

* في النهايه عطلتك ، بس ليك الاجر والله ، ما عليك امر لف من هنا بالبوابة دي ..

_ حاضر ‏( مبتسم ‏)

* نزلني هنا ،حمدلله باقي تلاته دقايق ، طيب انا حابه احاسبك على المشوار ' بتردد '

_ انا ما ملاكي اجرة ،

* اسفه ما بقصد بس نفسي احس اني جازيتك حق مساعدتك لي و *..... قاطعني

_ الوقت بيمشي و عشان اختصر ليكي ، لو حابة تردي لي مساعدتي فعلاً زي ما بتقولي ، سجلي لي رقمك هنا ! و اي سوال حتطرحيهو علي حياخد منك وقت زيادة !

* بقيت واقفه فاتحه خشمي بتحت النقاب ، حسيت ان فعلاً مافي وقت لطرح الاسئلة ، شلت التلفون منو بالشباك ، كتبت رقمي و جريت جري على البوابة حتى ما اتلفت وراي ، طلعت بطاقة الدخول و جريت على القلعه دخلت مع التوزيع ،،

دخلت قعدتا ، اخدت نفسي ، حسيت بالاستقرار والراحه يا داب و بعداك اتفرغتا للامتحان ...... من استلمت الورقه ، ما رفعت راسي الا على صوت '' مضى نصف الزمن '' ! ورجعت كملتا ، لحد ما حسيت بالكفاية ، و سلمت ورقتي و طلعتااا ...

بالجد اليوم دا مشربك و غريب شديد ، اتصلت لي شيماء ، اتلاقيناا ، قلت ليها انا تعبانه م قادرة افتح عيوني ياداب الحق اصل البيت انوم لي ساعه عشان ربنا عالم بالحاصل الفي البيت ! نتلاقى المساء ومشيت ،مسكتني لفتتني قالت لي : نعم نعم ! مساء شنو ، يختي انا اصعب مادة دي والله ان بقى قدام خشم بابنا و لا بمد راسي اتاوق !

قلت ليها والله ضايقتيني لان الوضع دا مفروض علي و نفسي اقرا ، قالت لي رحمة انتي ماشاءالله ما زي عمرك ما بتزنقي نفسك ليلة الامتحان ، عكسي اناا ، بس اوعدك كان حسيت ان خلقي ضاق بجي بس خلي تلفونك معاكي طوالي ، قلت ليها ربنا يتمم اخر امتحان دا على خير .. يلا انتبهي على نفسك مع السلامة ، ودعتها و طلعتا ..

‏( في جانب ابوي ‏)

* صباح الخير يا الفاضل ..

_ صباح النور يا اخوي

* حتضبح جمب خشم الباب و لا ازبط الامور عندي في المحل ..

_ والله ما عارف التشوفو صح اعملو

* عديلة

_ اسمعني يا محمد ، انا دايرك في موضوع والله ، بس بعد عرس البنية دا ينتهي على خير !

* قولو اسي ..

_ اسي دا مفروض نمرق على الرجال ديل و كمان لازم امش اجيب اولاد عمتك ديل جاين من البلد ما عارفين شي في الخرطوم ..

* نمش معاك ..

_ لالالا خلي لي العربية انت خليك مع الرجال الهنا ديل ..

* موضوعك خير يا الفاضل ؟

_ خيررررر و خير كمان ما تشيل هم

* كان دا ، شلت الصبر

_ يلا انا بمش

* هاك المفتاح ...

رجعت بالمواصلات ، و ما فاهمم حاجة بالجد قلة النوم صعبة !

لمن وصلتا ، لفيت شارع بيتنا مشغول ، انا للحظة حسيت ان دا عرس هنود ، من كمية الزينة الشغالين فيها ،كل تلااه متشعبطين في حيطة بسلم ، ما عارفه لكن اول مرة اتحمس لعرس رغم اني بعيدة شديد من الحاجات دي ..

قبل ادخل البيت لاقيت ابوي برا ، قالي ، يا السمحة ، طمنيني ؟ قلت ليهو مررررهقة يا ابوي والليله شريتني بفتش فيك ثا عرفتا محل نايم ووين !

قالي يا الله والله راح من بالي ، مشيتي كيف ؟ والله يا ابوي دبرتها ، اسي انا فترانه عايزة امشي احاول انوم لي ساعه !

قالي خلاص اكلي اول ، قلت ليهو حاضرر ..

مع دخلتي البيت لقيت امي و ثعاها مرة جيرانا شايلين طشاطة و مارقين ، دار بينا نفس الحوار البيني و بين ابوي .. اخر شي دخلتاا ، لقيت لي سرير فاضي , طوالي طلعت نقابي و عبايتي و اترميت في السرير ، بعداك حصل شنو علمي علمكم ..

فجاة بقيت سامعه صوت وحدة بتصحيني ، فتحت عين عاينت ليها و رجعت غمضتا ، لقيتا بتقولي : يا رحمة عليكي الله ما تكسري بخاطري انا جيتك بدري ، عارفاكي م حتكوني فاضية تمكيجيني بعد شوية !

فتحت عيني عاينت ليها ! تلقائياً صريت وشي ، لمن لقيتا اسماء ..

قمت قعدت قلت ليها انتي عارفه يومي كان كيف المريت بيهو ! لو عارفه ما كان صحيتيني ، عاينت لي باستغراب ، قالت لي اسفه و قامت من السرير ..

قلت ليها دقيقه ، وريني صورة مكياجك الحاباهو ، قالت لي لالا خلاص !

انا ما كعبة والله لكن مصدومة منها ما عارفه اتعامل معاها كيف ، حسيت اني رديت رد ما بيشبه اخلاقي و زعلت من نفسي .. قلت ليها انا اختك و الاخوات ما بيزعلو من بعض يا اسماء بس لاني ما بحب زول

يصحيني عشان ما بقدر ارجع انوم تاني و بقوم مصدعة ..

قالت لي انا اسفة والله ، بس انا جيت هنا بعد تعب زي ما عارفه اخت العريس والوضع بكون كيف .. قلت ليها ما مشكله ، ديل مكياجاتك حابة اعمل ليك بيهم و لا من حقاتي ؟ قالت لي اليريحك بس دايرة البسيط ، قلت ليها حقوم ادخل الحمام و اعمل كباية شاي و اجيكي .. قالت لي تمام ...

فعلاً قمتا ، و بتكلم في سري انا ليه شايلة منها في حين ان دا خيارها يعني ، طالما الحاجة ما بتمسني !!

فعلاً جيت عملت ليها و بتونس معاها ، و بعداك قعدو لي بالصف ، لمن فصلتا و المغرب قرب يأذن ، شلت شنطتي و مشيت للعروسه ، لقيت اسعد مع الاولاد لسه بيعلقو في الانوار انا زينة زي دي ما للاقتني الا في قناة بوليوود ، تفاصيل العرس دا بالجد دخلت جواي معنى الفرح ، المهم اتأكدت ان نقابي في وشي و طلعت ، دغرررري دخلت بيت عمي ، مشيت لسماح ، لقيت الحنة دي تسو كدي ، ما شاءالله ..

اخدنا قعدتنا و زبطتها تمام ، من المغرب خلصنا العشاء ،كنت هلكاااانة ، رجعت البيت م شايفه قدامي ‏( مع العلم ان الحنة كانت في بيت ناس عمي ‏)

جيت رقدتا لي زي ساعه كدا قلت ما بمشي الا قريب نهاية الحفلة و قفلتا الباب عشان مافي زول يجي يناديني ،،

بالله ختت راسي كدا مع دوشه الاغاني ديك نمتة كيف ما بعرف ، اتخيلووو انا ما صحيت الا بي رزغ و خبط في باب الغرفه كانت الحنة انتهت ، فتحت لقيت يمنة و ريان و معاهم بنت ، عاينت ليهم عرفت ان الحنة انتهت ، طوالي رجعت سريري ، كملتا نومتي ، صحيت بصوت اذان الفجر ، حمدلله مرتاحه ، قمتا من السرير ، بنطط النايمين في الارض عشان ما اعفص لي زول ..

فتحت الدرج شلت كتبي و تلفوني و توب و المصلاية ، خمخمتهم كدا ، و جا دور سفنجتي ما لقيتااا ، طلعت كدااا و قفلت الباب وراااي ،

مع طلعتي كدا لقيت لي سفنجة ما بعرفا حقت منو ، مشيت بيها الحمام و الذ شي البيت دا صاني الناس دي مجدعه ساي ،مشيت اتوضيت و صليت المغرب حق امبارح و العشاء و الصبح ،،

وطلعت الحوش الورااني ، نورت النور ، و قعدت في كرسي و رفعت رجلي في كرسي قدااامي ، و فتحت كتبي و بقيت اقراااا ، لحد الشمس دي شرقت ، رجعت الغرفة شلت ملابسي و شنطتي ولبست الليله من بدررري

، عملت لي كباية شاي ، لقيت امي صحت ، و دعتها و طلعتااا ..

مع طلعتي كدااا .....